सर्व ज्योतिषप्रेमी, अभ्यासक व आमच्या सेवा-सुविधांचा लाभ घेणाऱ्या प्रत्येकासांठी…
जगप्रसिद्ध महान नाटककार शेक्सपिअर म्हणून गेलाय की ‘नावात काय आहे?’ आता एवढा मोठा व्यक्ती म्हणतोय तर काही वेळासाठी आपल्यालाही वाटायला लागतं की, ‘खरंच नावात काय ठेवलंय?’ मात्र वास्तविकतेचा विचार केला असता परिस्थिती याच्या अगदी विपरीत दिसून येते. सर्वकाही नावातच व नावासाठीच तर सुरु आहे. किंबहूना ‘नावात काय आहे?’ असं म्हणणाऱ्या शेक्सपिअरने स्वत: लिहिलेल्या नाटकांना न चुकता स्वत:चे नाव दिले, ही बाब आपल्याला विसरुन चालणार नाही. आज त्याचे नाव एक ब्रॅण्ड झालेले आहे. म्हणजे आज इतक्या वर्षानंतरही त्याने निर्माण केलेल्या कलाकृती केवळ त्याच्यावरच चालत आहेत. थोडक्यात नाव ही आपली ओळख असते आणि ओळख ही खूप परिश्रमाने बनवावी लागते . खूप मोठी तपस्या त्यासाठी करावी लागते. तेव्हाच नावाला ओळख प्राप्त होते. एक वलय प्राप्त होतं. सर्वात महत्त्वाची बाब म्हणजे ओळख बनविण्यासाठी जेवढे परिश्रम करावे लागतात तेवढेच ओळख टिकवून ठेवण्यासाठी देखील करावे लागतात. अनावधानाने जरी आपल्याकडून एखादी चुक झाली तर नाव खराब होण्याची शक्यता असते. त्यात समाजातील काही विघातक प्रवृत्ती जणू काही अशा व्यक्तींच्या शोधातच असतात. समोरील व्यक्तीच्या नावाचा दुसरोप करणे किंवा विनाकरण त्रास देण्याचा प्रयत्न करणे, हा जणू त्यांचा व्यवसायाच झालेला असतो. आयुष्यातील अनेक वाईट अनुभावांमध्ये हा अनुभव देखील आपल्या वाट्याला येऊ शकतो. जो माझ्या आलेल्या आहे. म्हणूनच हा लेखन प्रपंच…
श्री ज्योतिष संशोधन केंद्र गत तीन वर्षांपासून ज्योतिष क्षेत्रात भरीव कामगिरी करीत आहे. अर्थात काही गोष्टी ध्यानी मनी नसतांना खूप व्यापक स्वरुपात होऊन जातात. आपल्या प्रामाणिक प्रयत्नांचे व चांगल्या उद्देशाने ते फळ असते. वास्तविक पाहता, मी गत २२-२३ वर्षांपासून ज्योतिष क्षेत्रात सेवाव्रत आहे. मात्र आधुनिक तंत्रज्ञान व सेवासुविधांचा लाभ घेत ज्योतिषशास्त्र घराघरात पोहोचावे… प्रत्येकाला शास्त्राचा लाभ घेता यावा… या उदात्त हेतूने आम्ही ऑनलाईन फ्लॅटफॉमवर काही नि:शुल्क उपक्रम सुरु केलेत. ते सुरु करीत असतांना उद्देश निश्चितच मोठा होता. मात्र त्याला इतक्या कमी वेळात आणि इतक्या व्यापक स्वरुपात प्रसिद्धी मिळेल, याचा मी विचारही केलेला नव्हता. खरं सांगायचं तर आमच्या पिढीसाठी ऑनलाईन ही संकल्पना मूळातच अगदी नवीन होती. मला कुठलाही अनुभव नव्हता. परिणामी रोज नव्या समस्या उभ्या राहत होत्या. त्या सोडविता सोडविता रोज आम्ही नवीन काही तरी शिकत होतो. ही प्रक्रिया अगदी आजही सुरु आहे. फरक फक्त इतकाच की ज्याप्रकारे उपक्रमांची व्याप्ती वाढली आहे, त्याप्रमाणे समस्यांची व्याप्ती देखील वाढली आहे.
यातील एक फारच भयंकर अनुभव म्हणजे एका महाशयांनी चक्क माझ्या नावाने वेबसाईट तयार केली आहे . त्यातही आश्चर्यजनक बाब म्हणजे असे बेकायदेशीर विषय ज्यांना कोणताही सुज्ञ ज्योतिष अभ्यासक थारा देणार नाही, किंबहूना भयंकर गुन्हा ठरतील असे भडक विषय त्या बेवबाईटवर टाकलेले आहेत. ही बाब जेव्हा पहिल्यांदा समजली तेव्हा मला खूप मोठा धक्का बसला होता. वेळ न दवडता मी यासाठी लगेच आयटी तज्ज्ञांची मदत घेतली. मात्र शोकांतिका म्हणजे समोरील व्यक्ती इतका हुशार आहे की आपण कितीही प्रयत्न केले तरी बेकायदेशीर बाब करुनही तो कायद्याच्या कचाट्यात अडकू शकत नाही. शेवटी त्याला कोपरापासून हात जोडावेसे वाटले.
श्री ज्योतिष संशोधन केंद्राच्या सर्व उपक्रमांचा सुरुवातीपासूनच मूळ उद्देश शास्त्राचे शास्त्रशुद्ध ज्ञान व शास्त्राचा प्रचार-प्रसार करणे हा राहिलेला आहे. त्यामुळे भलेही परवानगी न घेता कोणी माझ्या नावाचा उपयोग करुन चांगली कामे केली असती, या कामात मदत केली असती तर मला खूप आनंद झाला असता. मात्र ज्या गोष्टी मूळात आपल्या तत्त्वातच बसत नाहीत, ज्यातून समाजाची दिशा भूल होते, शास्त्राचा प्रचार-प्रसार होण्यापेक्षा नाव खराब होते त्या गोष्टी आपण सहन तरी कशा आणि का म्हणून करायच्या? हा फक्त माझ्या नावाचाच नव्हे तर शास्त्राचाही दुपयोग ठरतो. त्यामुळे शास्त्राचे सर्व अभ्यासक, ज्योतिषप्रेमी व आमच्या सेवा-सुविधांचा लाभ घेणाऱ्या सर्वांना आमचे आवाहन आहे की अशा चुकीच्या गोष्टींना तुम्ही अजिबात बळी पडू नका. श्री ज्योतिष संशोधन केंद्राचे सर्व उपक्रम फक्त सहा ऑनलाईन फ्लॅटफॉर्म्स उपलब्ध आहेत. ते प्लॅटफॉर्म्स म्हणते….

१) ऍस्ट्रोगुरु डॉ.ज्योती जोशी युट्युब चॅनल (मराठी)

२) ऍस्ट्रो गुुरुमाँ डा. ज्योति जोशी युट्युब चॅनल (हिंदी)

३) अभ्यास ज्योतिषशास्त्राचा फेसबूक ग्रुप

४) ऍस्ट्रोगुरु डॉ. ज्योती जोशी मोबाईल अ‍ॅप्लिकेशन

५) भविष्य दर्पण (ई-मासिक)

६) www.drjyotijoshi.com

याशिवाय वेबसाईटचे काम अजून प्रगतीपथावर आहे. आश्चर्याची बाब म्हणजे आमची वेबसाईट कार्यान्वित होण्याच्या आधीच इतर कुणी नावाचा दुरुपयोग करण्याचा प्रयत्न करीत आहे. त्यातहून आश्चर्याची बाब म्हणजे प्रयत्न करुनही समोरील व्यक्ती कोण आहे? हे देखील अजून शोधता आलेलं नाही. असो.. आम्ही आयटी तज्ज्ञांची मदत घेऊन कायदेशीररीत्या त्यादृष्टीने काय करता येईल? याचा प्रयत्न करीत आहोतच. मात्र आमच्याशी संबंधित सर्वांना या द्वारे सूचित करावेसे वाटते की फक्त माझे नाव दिसते आहे, म्हणून तुम्ही या गोष्टींचा अजिबात बळी पडू नका. सोबतच हे माझ्या सोबत झाले आहे तर कोणासोबतही घडू शकते. आम्हाला टेक्निकल गोष्टींचे पूर्ण ज्ञान नसल्यामुळे ही बाब घडून आलेली आहे. त्यातून आम्हाला जो त्रास सहन करावा लागला, तो तुम्हाला करावा लागू नये किंवा फसवणूक देखील होऊ नये, हाच आमचा उद्देश आहे. म्हणून त्या दृष्टीने योग्य ती काळजी घ्या.

धन्यवाद!
शुभम भवतु!
डॉ. ज्योती जोशी